Кадерле китап укучылар!
Сезгә “Казан Утлары” журналының 2024 нче елнын 10,11,12 нче саннарына күзәтү тәкъдим итәбез.
ТР Рәисе каршындагы Татар телен һәм ТРда яшәүче халыклар вәкилләренең туган телләрен саклау һәм үстерү мәсьәләләре комиссиясе оештырган әдәби бәйгедә җиңгән әсәрләрне журналда бирүне дәвам итәбез. Журналның 10,11,12 нче саннарында шушы бәйгедә катнашкан язучы Зиннур Хөсниярның “Әллүки” романы тәкъдим ителә. Шулай ук бәйгедә үсмерләр әдәбияты номинациясендә 1нче урынга лаек булган Айгөл Әхмәтгалиеваның “Без андый малай түгел” повесте 12 нче санда басылган. 10, 11,12 нче саннарда Нәзифә Кәримованың “Озын-озак ямышлар” повесть - истәлеге белән таныша аласыз. 10 нчы санда язучы Рафис Корбанның махсус хәрби операция (СВО) герое Рәсим Баксиковка багышланган “Танкистлар” дигән документаль повесте тәкъдим ителә.
2024 нче ел Россиядә “ Гаилә елы” дип игълан ителде. Журналыбыз “Оясында ни күрсә” әдәби конкурсын башлап җибәргән иде. Конкурс кысаларында Фәнүзә Якупованың “Гыйбрәтле хата” (10 нчы сан), Равилә Шәйдуллина - Муратның “Чәчкә таҗларында күз яше” (11 нче сан), Галимҗан Гыйльмановның “Бүләккә – әти” (12 нче сан) хикәяләрен укый аласыз.
Шигырь яратучылар Илсөяр Иксанова, Рүзәл Мөхәммәтшин, Гөлзадә Әхтәмова шигырьләре белән 10 нчы санда, Ризәлә Исмәгыйлева, Рәдиф Гаташ белән 11 нче санда, Луиза Янсуар, Алисә Зарипова шигырьләре белән 12 нче санда таныша ала.
Сезнең игътибарга “Такташ FEST” бәйгесе нәтиҗәләрен тәкъдим итәбез. Жиңүчеләр: Булат Ибраһим, Зөһрә Рамазанова, Гөлүсә Батталова һәм башкаларның шигырьләре 11 нче санда бирелә.
Журналның “Яңа исемнәр” рубрикасында Фирдәүсә Бикмәтова (10 нчы сан), Рузалия Шакирова (11нче сан) иҗатлары урын алган.
Шулай ук бу саннарда галимнәр Рифат Сверигинның (10 нчы сан), Әлфәт Закирҗановның (11 нче сан) тәнкыйди мәкаләләре тәкъдим ителә.
Тәлгать Галиуллинның исә Дәрдемәнднең тууына 165 елга багышланган язмасы белән 11 нче санда таныша аласыз.
Тагын бер юбиляр – академик Дания Заһидуллина. Аның эшчәнлеге белән таныштырып 10 нчы санда Әлфәт Закирҗанов язмасы бирелә.
“Әбугалисина мәгарәсе” дигән рубрикада галим Илдус Заһидуллинның Каюм Насыйриның 200 еллыгына багышланган язмалары 10, 11, 12 нче саннарда да урнашкан.
“Хатлар яздым утырып” рубрикасында, халык шагыйре Равил Фәйзуллинга төрле елларда юлланган хатлар тәкъдим ителә.