Кадерле китап укучылар!
Сезне 2024 елның 3 кварталында чыккан татарча яңа тавышлы китаплар тупланган җыентык белән таныштырабыз.
1. Гомәр Бәширов “Намус”.
Намус романында Бөек Ватан сугышы чорындагы авыл- колхоз тормышы сурәтләнә. Төп геройлар – Нәфисә, Сөмбелә, Карлыгач, Мәүлиха һ.б. югары уңыш өчен көнне төнгә ялгап көч куялар, фашистларга каршы шулай көрәшәләр. Үзәктә - халкыбызның батыр кызы Нәфисә образы. Ул фидакарь хөзмәте белән дә, рухи дөньясының байлыгы, камиллеге белән дә, татар хатын - кызының үрнәк сыйфатларын үзенә берләштергән герой.
2. Флүс Латыйфи , Ринат Якуш “Тамга”.
Танылган язучы, «Хыянәт» романы, күпсанлы повестьлар, хикәяләр авторы Флүс Латыйфи һәм Казан дәүләт университеты доценты Ринат Якуш язган бу повестьларны татар әдәбиятында яңа күренеш дип бәяләргә мөмкин. Катлаулы, тыгыз сюжетка корылган әсәрләр укучыны ма-җаралары белән генә түгел, ә бүгенгене үткәннәргә тоташтыручы хыял һәм чынбарлык турында фәлсәфи уйланулары белән дә җәлеп итә. Китап бай, йөгерек тел белән язылган, үтә четерекле мәсьәләләргә кагылышлы булуга карамастан, гаять җиңел укыла.
3. Айдар Хәлим “Татар солдаты”
Әлеге роман Рейхстаг гөмбәзенә иң беренчеләрдән булып Җиңү Байрагы кадаган каһарман милләттәшебез Гази Заһитов-ның тормышын һәм данлы сугышчан юлын сурәтләүгә багышланган. Язучы А. Хәлим бу әсәрен, архив материалларына, тарихи документларга нигезләнеп, Г. Заһитов һәм аның сугышчан дуслары (В. Маков, А. Лисименко, М. Минин, А. Бобров һ. б.) батырлыгын мавыктыргыч сюжетка салып, «окоп дөреслеге» дәрәҗәсендә тасвирлап биргән. Үзләренә лаек бәя ала алмыйча бакыйлыкка күчкән сугыш каһарманнарының якты истәлегенә багышланган бу роман бер әдәби елъязма да булып тора.